Somos MathCityMap!!!

Estreamos as entradas do noso blog neste curso para comunicarvos unha boa nova. 

Acabamos de recibir a notificación oficial de que o noso centro foi admitido como Escola Asociada do proxecto MathCityMap, unha ferramenta desenvolvida pola Universidade Goethe de Frankfurt para incentivar o uso aplicado das matemáticas fóra da aula.

Podemos dicir fachendosos que somos o primeiro centro escolar de Galicia que se une a este proxecto. Algo que logramos grazas aos roteiros matemáticos que o centro leva dous anos desenvolvendo co alumnado de terceiro curso, e que pronto se extenderá a outros.

Estes Roteiros Matemáticos consisten en camiñatas guiadas por un mapa interactivo. O alumnado observa a súa posición nas pantallas dos seus móbiles e enfróntase a retos matemáticos relacionados coa contorna na que se atopa.

Resolver estos retos implica explorar, medir e/ou inferir sobre un obxecto. Hai pistas e máis ou menos puntuación segundo as respostas correctas. Son retos que precisan da interpretación do contexto no que se atopan e da modelización matemática das diferentes situacións. Ademais, contribúen á valoración dos espazos públicos e do noso patrimonio natural e cultural.

Animámosvos a participar deste proxecto tamén no voso tempo libre, facendo uso das varias rutas públicas que podedes atopar pola vila. Só tendes que descargar a aplicación MathCityMap nos vosos móbiles ou tabletas (Android ou IOs) e activar a localización GPS para buscar as rutas máis cercanas. Na nosa vila temos tamén pequenas rutas para pasar un pedaciño entretido cos máis pequenos, desde 1º de primaria.

Pronto máis novidades.